الرئيسية » مقالات » عن لحضات الوصول من الغوطة الى قلعة المضيق

عن لحضات الوصول من الغوطة الى قلعة المضيق

كنت متوقعة يتغير علي كتير شغلات اذا طلعت بيوم من الغوطة. .
تخيلت اني استصعب المشي بشوارع فيها سيارات مسرعة.. تخيلت مولات كبيرة صرلي زمان مو زايرتها..
بس ما تخيلت انو حتى معاملة البشر تتغير معي.
كتير عم خاف لما قطع الشارع.. هون السيارات اكتر بكتير وماشاء الله البنزين نظامي.. يلي بيعرف البنزين البلاستيكي رح يعرف الفرق بين قوة وسرعة السيارة الماشية على البلاستيكي او النظامي..
حتى المحلات لما عم فوت عليها عم حاول داري الاندهاش من كمية البضاعة والماركات.. صار اني دخلت على صيدلية هون بعد مرض اكتر من شهر بالاقبية (التهاب لوزات ورشح وسعلة).. طلبت من الصيدلاني اسم دوا.. قلي معلش من غير شركة؟
😅يحرء حريشه على هل مزحة.. لو قلي معلش يكون خالص مدته من شهرين كنت رح اقبل..
يازلمة صرلنا خمس سنين عم نستخدم ماكسللين وسيتامول تاميكو يلي خالص مدته من وقت ما وقف المعمل.. جاي تستأذن انو تغير الشركة المصنعة للدوا..
ضحكت قلتله متل ما بدك وما حبيت اشرحله مأساة عمر.
اما بخصوص معاملة البشر.. في شي عم يدهشنا..
قال بالشكر تدوم النعم.. الحمد والشكر لله يارب لا تغير نفوس الناس المنيحة..
بعد سبع وعشرين ساعة ونص مسرحية بايخة على الطريق من الغوطة للمضيق.. وصلنا لقينا بشر من منظمات عم ينتظرونا..
مالي بصدد احكي عن المنظمات حتى ما يخرج المنشور عن الهدف منه..
بس بزمناتي كنت شوف الاستجابة الطارئة للمهجرين قبلنا من داريا وحلب وغيره..
كانوا شباب “بنفسج” يلفتوا نظري.. يمكن لان الاسم مو موجود بالغوطة..واللون الخاص فيهن حلو😇 يمكن تواجدهن بيكون لافت بهيك ظروف..
المهم اجا اليوم يلي للاسف كنت انا موضوع الاستجابة الطارئة..
بالنسبة الي كان اهم شي عندي هو المي واحصل على طريقة للتواصل..
بنفسج كانت فاتحة واي فاي مجاني. . اي ممكن حدا يقول واجب المنظمات او مجرد مشاريع عم ينفذوها.. بس اكيد مو واجب المتطوع فيهن يلي عم ياكل سندويشته انو يحلف على ابني ويعزموا عليها.. ابني مصمم انو ما بدو والمتطوع مصمم يعطيه ياها..
ولا واحد منهم كان معصب رغم حجم الضغط .. اكتر من مية باص وصلنا سوا وبكل باص في اكتر من 50 راكب..
كتير بتشكرهم وبتشكر المهنية والاخلاق العالية يلي شفتها منهم بهداك اليوم..
فتت على النت لقيت اكتر من مية رسالة: وينك انتي ؟ وبيوت معروضة للاستضافة..
انا ما كان عندي مانع روح على مخيم مقارنة مع القبو.. كان بدي ربع مكان آمن ارتاح فيه..
شباب من منظمات كتيرة شي سمعانة فيها وشي لاء.. كلهن بدهن يساعدوا وهنن عم يعرضوا الخدمات.. يجاوبوا قبل ما نسألهم ويساعدونا قبل ما نطلب المساعدة..
ياريت بعرف المتطوعين والمتطوعات يلي كانوا بهداك اليوم لاشكرهم واحد واحد..
شباب وصبايا ولاد اصل اصروا يستضيفونا بأول يوم.. نحنا 21 شخص مرتبطين ببعض.. ونكبة على يلي بدو يستضيفنا.. كمان اصروا ونفذوا الاستضافة..
الشب حمل الاغراض عن ابني ولما قصي رفض بخجل انو حدا يحمل عنه.. قله الشب انتو جايين من الغوطة ونترككن تحملوا انتو..
يا ويلي ما كان عرفان انو ما بدنا حدا يستضيفنا ولا يحمل عنا اغراضنا.. لك كان بيكفينا نشعر انو لسا الدنية بخير.. وهي شعرنا فيها بأول لحظة وصلنا فيها على المحرر..
بسمة على وجه الكل.. همة بتجنن.. نسينا عذاب سبع سنين وسبع وعشرين ساعة..
شوكولا واكلات طيبة وصلتني من أول لحظة.. حسيت حالي جدبة وبدي ابكي..
في حدا بالدنية مهتم بتفاصيل الشغلات يلي بحبها ومعذب حاله متسوق ليفاجئني فيها..
والله تفاجأت لدرجة ماعاد عرفت اشكر هل عالم..
مو بس هيك.. اكتر ناس تعبوا معنا هنن ناس برا البلد وعم يتواصلوا مع حدا جوا ليساعدنا..
اكتر صبية عملت جهدها لتحول منفانا لوطن وغربتنا لسكينة.. هي صبية برا البلد دوبني حاكية معها مرتين أو تلاتة.. دايما بدعيلها الله يكافيها على قد ما اعطتني دعم بلحظات كنت تعبانة وبحاجة دعم..
الدعم المعنوي يلي وصلني ما بعرف اذا بقدر رده بيوم من الأيام.
الورقة يلي على المحل مكتوب عليها: اهل الغوطة فطوركم علينا.. بتخلي قلبي يرجف..
والله نحنا سوريين حلوين ولسا فينا النخوة..
مو الفكرة بالمصاري.. الفكرة بالهمة والنخوة

يلي بيقول انهزمنا غلطان.. لازم نصحح مسارنا مزبوط.. ونتعلم من أخطائنا اكيد..
بس اذا مشينا صح مع هل همة الحلوة يلي عنا.. اكيد رح نوصل..

رغم كل هل منشور الطويل لسا في كتير شغلات حلوة ما حكيتها.. وفي كتير ناس قد ما شكرتهن ما بوفيهن..
الحمد لله يلي عم يحط بطريقنا الناس الحلوين.. وهدينك جماعة السيادة الله يهنيهن ببعض.

انظر ايضا

ما الذي يجمع العرب بالاتراك

بقيَّت صناعة الأخبار في العالم العربي مرتبطة بشكل أساسي بالدولة التي تُمارس الوصاية الفكريَّة الكاملة …

زيهوفر: سنتبع سياسة جديدة ضد اللاجئين المرفوضة طلباتهم

أكد وزير الداخلية الألماني “هورست زيهوفر” على أن وزارته ستنتهج سياسة صارمة ضد اللاجئين الذين …

منطق الهجوم الكيماوي

حسن منيمنة معهد واشنطن لسياسة الشرق الأدنى: كانت معركة الغوطة تشرف على نهايتها، وكانت الوحدات …